പ്രണയം

ശലഭത്തിനൊരു പ്രണയമുണ്ടായിരുന്നു
അത് പൂവ് അറിഞ്ഞിട്ടില്ല....
പൂവിനുമൊരു പ്രണയമുണ്ടായിരുന്നു
അത് ശലഭവും അറിഞ്ഞിട്ടില്ല.

സൂര്യകാന്തിയുടെ പ്രണയം
സൂര്യന്‍ അറിഞ്ഞിട്ടില്ല.
സൂര്യന്‍റെ പ്രണയം സൂര്യകാന്തിയും.

മഞ്ഞുതുള്ളിയുടെ പ്രണയം
പുല്‍ക്കൊടിയും.
പുല്‍ക്കൊടിയുടെ പ്രണയം
മഞ്ഞു തുള്ളിയും
നാളിതുവരെ അറിഞ്ഞിട്ടില്ല.

തനിയ്ക്കു വേണ്ടി പെയ്തിറങ്ങിയിട്ടും
മഴയുടെ പ്രണയം തന്നോടാണെന്ന്
ഭൂമി  അറിഞ്ഞിട്ടില്ല..
തന്നില്‍ അലിഞ്ഞില്ലാതാകാന്‍ കൊതിച്ച 
ഭൂമിയുടെ പ്രണയം മഴയും അറിഞ്ഞില്ല.

നമുക്കുമുണ്ടായിരുന്നു ഒരു പ്രണയം
വാക്കുകള്‍ക്കിടയിലെ മൌനം
പ്രണയമെന്ന് തിരിച്ചറിയാന്‍
നമുക്ക് കഴിയാതെ പോയി.

ചില മൌനങ്ങള്‍ പ്രണയത്തിന്‍റെ 
തിരിച്ചറിവില്ലാതാക്കുന്നു.

എങ്കിലും പരസ്പരം അറിയാതെ
മണ്ണും മഴയും ഇലയും മഞ്ഞു തുള്ളിയും,
സൂര്യനും സൂര്യ കാന്തിയും 
വീണ്ടും വീണ്ടും പ്രണയിച്ചു കൊണ്ടേയിരുന്നു.

നമ്മളും................